Një shtetas i Kosovës, i kërkuar me urdhërarrest ndërkombëtar nën dyshimin për përfshirje në veprën penale “Dhunimi”, është ekstraduar të shtunën nga Kroacia në Kosovë.
Policia e Kosovës ka njoftuar se ekstradimi është realizuar më 15 gusht 2026 nga Drejtoria për Bashkëpunim Ndërkombëtar Policor (ILECU), në koordinim me njësitë përkatëse policore dhe institucionet e drejtësisë.
“Me datën 15.08.2026 është ekstraduar nga Kroacia për në Kosovë, shtetasi i Kosovës, pasi që i njëjti kërkohej me urdhër arrest ndërkombëtar të lëshuar nga institucionet e drejtësisë për përfshirje në veprën penale ‘Dhunimi’”, thuhet në njoftimin e Policisë.
Pas përfundimit të procedurave të ekstradimit dhe mbërritjes në Kosovë, i dyshuari u është dorëzuar njësive kompetente të Policisë së Kosovës.
Ndaj tij pritet të vazhdojnë procedurat e mëtejshme ligjore në përputhje me urdhërarrestin e lëshuar nga institucionet e drejtësisë.