Ushtruesja e detyrës së presidentes së Kosovës, Albulena Haxhiu, pasi është bërë identifikimi i tri viktimave nga analizat e ADN-së të mbetjeve mortore, të cilat u zhvarrosën në varrezat masive në Kalludër dhe Jabukë të Zubin Potokut, ka theksuar se institucionet e vendit nuk do të ndalen derisa të gjendet edhe personi i fundit i zhdukur me dhunë nga forcat serbe në luftën e fundit në Kosovë dhe përgjegjësit të dalin para drejtësisë.
Haxhiu në një postim në Facebook theksoi se për 27 vjet, këto familje jetuan pa ditur ku ishin më të dashurit e tyre.
“Tri familje morën sot lajmin për familjarët e zhdukur me dhunë që prej vitit 1999. Analizat e ADN-së konfirmuan identitetin e tri viktimave, mbetjet mortore të të cilave u zhvarrosën në varrezat masive në Kalludër dhe Jabukë të Zubin Potokut. Ata ishin pjesë e grupit të njohur si ‘Grupi i Intelektualëve’, shqiptarë nga Skenderaj dhe Mitrovica, të rrëmbyer nga forcat serbe më 19 prill 1999. Për 27 vjet, këto familje jetuan pa ditur ku ishin më të dashurit e tyre. Sot ato e dinë. Dhimbja mbetet, por kjo pritje e gjatë mbaroi. Jam pranë tyre në këtë ditë. Bashkëndjej edhe me familjet e tjera që presin rezultatet e gërmimeve në javët në vijim”, ka shkruar Haxhiu në Facebook.