Avokati Emrush Kastrati ka thënë se çdo iniciativë që synon lehtësimin e procedurave ndaj ish-krerëve të UÇK-së, të shpallur fajtorë në shkallën e parë nga Dhomat e Specializuara, është e dobishme dhe e arsyeshme.
Duke komentuar iniciativën për ndryshimin dhe plotësimin e Ligjit për Dhomat e Specializuara, Kastrati ka thënë se hapat e ardhshëm duhet të diskutohen në mënyrë objektive dhe pa emocione.
“Çdo iniciativë pozitive që ka për qëllim lehtësimin e procedurave ndaj ish-krerëve të UÇK-së, të shpallur fajtorë nga Dhomat në shkallën e parë, është dobiprurëse dhe e arsyeshme. Paraprakisht e gjykoj se duhet të diskutojmë në mënyrë objektive për hapat që duhet t’i marrim. Çdo hap i marrë duhet pa emocione”, ka deklaruar Kastrati.
Sipas tij, në kohën kur është hartuar ligji për Dhomat e Specializuara, kanë ekzistuar mangësi, ndërsa ka ngritur edhe çështjen e përbërjes së trupave gjykuese.
“Në rastin konkret, në kohën kur është hartuar ligji, ka pasur mangësi. Është pranuar versioni i Dhomave të Specializuara. Pse gjyqtarët vendorë të mos jenë vendorë, e jo vetëm të huaj?”, është shprehur ai.
Kastrati ka thënë se përbërja e trupave gjykuese me gjyqtarë ndërkombëtarë, sipas tij, ka sjellë pasoja për Kosovën, duke përmendur edhe raste të tjera të gjykimit ndërkombëtar.
“Gjykimi me trupa gjykues vendimtarë të trupave gjykues ndërkombëtarë na ka sjellë dëme me UNMIK-un, etj., edhe pse me UNMIK-un ka pasur trup gjykues edhe vendor”, ka deklaruar Kastrati.