Policia e Kosovës ka sekuestruar një furgon dhe rreth 1 mijë artikuj të ndryshëm në Han të Elezit, të cilët dyshohet se ishin pa dokumentacion përkatës.
Sipas njoftimit të Policisë, më 28 shtator, njësitet e Drejtorisë së Kufirit pranuan informacion se në Han të Elezit ishte parkuar një furgon me targa vendore, i cili dyshohej se ishte i ngarkuar me mallra të ndryshme pa dokumentacion.
Gjatë veprimeve në terren, zyrtarët policorë kanë identifikuar edhe një depo ku ndodheshin mallra të ndryshme, njofton Dukagjini.
Në koordinim me prokurorin kujdestar, Policia ndërmori veprimet e nevojshme procedurale, ndërsa automjeti dhe mallrat u sekuestruan përkohësisht teks sot pas konsultimit me prokurorin kujdestar dhe ekzaminimit të mallrave nga zyrtarët e Doganës së Kosovës, rasti është iniciuar si kundërvajtje doganore.
Gjatë numërimit të realizuar nga zyrtarët policorë dhe doganorë janë evidentuar rreth 1 mijë artikuj të ndryshëm, përfshirë pajisje elektronike dhe teknike, pajisje kompjuterike, tekstil, materiale të ndryshme, duhan të papërpunuar si dhe artikuj të tjerë.
Automjeti dhe mallrat e sekuestruara i janë dorëzuar njësisë kompetente të Doganës së Kosovës për procedura të mëtejshme.