Deputetja e Lëvizjes Vetëvendosje, Arbërie Nagavci, ka deklaruar në Kuvendin e Kosovës se VV-ja do ta mbështesë ndryshimin e Ligjit për Dhomat e Specializuara, ndonëse ka thënë se duhet të bëhen të qarta kufizimet e këtij vendimi.
Ajo ka theksuar se nëse partitë që e mbështetën krijimin e Speciales në vitin 2015 sot kërkojnë ndryshimin e ligjit, LVV-ja do ta mbështesë nismën.
Nagavci ka thënë se, sipas saj, ndryshimi i ligjit nuk i liron ish-krerët e UÇK-së, nuk i përshpejton aktgjykimet dhe nuk e zëvendëson procesin e apelit.
Ajo ka thënë se VV-ja do ta mbështesë këtë nismë jo për shkak të ndryshimit të qëndrimit të saj, por me arsyetimin se një vendim që është konsideruar i gabuar nuk duhet të përdoret si arsye për të penguar korrigjimin e tij.
“Jo sepse kemi ndryshuar qëndrimin tonë, por sepse bindjen se një vendim ka qenë i gabuar dhe i dëmshëm nuk mund ta përdorim si arsye për të penguar korrigjimin e tij që ende mund të korrigjohet”, ka thënë ajo.
Nagavci ka kërkuar një strategji shtetërore për trajtimin e këtyre çështjeve, duke përfshirë angazhimin juridik dhe diplomatik.
“Apeli duhet të trajtohet me seriozitetin e një beteje të madhe juridike, me prova, argumente dhe dijen më të mirë që mund të vihet në shërbim të tij. Krahas kësaj, duhet një përpjekje e madhe diplomatike”, ka thënë ajo.