Deputeti i PDK-së, Arian Tahiri, ka propozuar shmangien nga afatet e përcaktuara me Rregulloren e Kuvendit për shqyrtimin e Projektligjit për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Tahiri, në emër të Grupit Parlamentar të PDK-së, ka propozuar që amendamentet të mund t’i adresohen Komisionit Funksional për Legjislacion deri në orën 14:30, ndërsa Komisioni ta shqyrtojë projektligjin deri në orën 15:30.
Ai ka propozuar që Komisioni, deri në orën 17:00, t’ia paraqesë Kuvendit raportin me rekomandimet për shqyrtimin e dytë të projektligjit.
“Në emër të Grupit Parlamentar të Partisë Demokratike të Kosovës, parashtroj mocionin procedural për shmangien nga afatet e përcaktuara me Rregulloren e Kuvendit për shqyrtimin e këtij projektligji, si vijon: Propozoj që amendamentet në Projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar të mund t’i adresohen Komisionit Funksional për Legjislacion deri në orën 14:30.
Komisioni Funksional, deri në orën 15:30, duhet ta shqyrtojë projektligjin në fjalë. Komisioni Funksional, deri në orën 17:00, pra sot, duhet t’ia paraqesë Kuvendit raportin me rekomandimet për Projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar, për shqyrtimin e dytë në seancën plenare.
“Shqyrtimi i dytë i Projektligjit për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar do të bëhet në seancën plenare sot, më 5 tetor 2026, në orën 17:30”, ka theksuar ai.