Presidentja e Kosovës, Vjosa Osmani, e ka uruar Shqipërinë dhe Maqedoninë e Veriut për fillimin e negociatave për t’u anëtarësuar në Bashkimin Evropian.
Ajo ka shkruar në Twitter se integrimi në BE i vendeve demokratike të Ballkanit është i domosdoshëm.
“Në këtë kohë përcaktuese, përshpejtimi i procesit të zgjerimit për vendet demokratike të Ballkanit Perëndimor është një domosdoshmëri!”, ka shkruar Osmani në Twitter.
Po ashtu, presidentja Osmani, u ka bërë thirrje vendeve të BE-së, që t’i liberalizojnë vizat për qytetarët e Kosovës.
“Ne u bëjmë thirrje vendeve anëtare të Bashkimit Evropian që ta dorëzojnë urgjentisht vendimin e vonuar për liberalizimin e vizave për qytetarët tanë”, shkroi Osmani.
Të martën, zyrtarisht kanë nisur negociatat për Maqedoninë e Veriut dhe Shqipërinë për t’u anëtarësuar në Bashkimin Evropian. Procesi ishte i bllokuar që dy vjet për shkak të vetos së Bullgarisë e cila kishte konteste të hapura me Maqedoninë e Veriut në lidhje me historinë dhe gjuhën. Meqenëse integrimi i Shqipërisë ishte bashkë në një pako me Maqedoninë e Veriut, procesi u bllokua edhe për të.
Ndërkaq, pas miratimit në Kuvendin e Maqedonisë të “Propozimit Francez”, u krijua hapësirë që negociatat të fillonin menjëherë. Me këtë propozim ishte pajtuar edhe shteti bullgar, i cili është zotuar se më nuk do të jetë bllokues i procesit.