Një person ka mbetur i vrarë dhe të paktën katër të tjerë janë plagosur nga të shtënat me armë zjarri në Trappes, në periferi të Parisit, ndërsa autoritetet franceze po e trajtojnë rastin si një incident të mundshëm terrorist, raporton BBC.
Kryeministri i Francës, Sébastien Lecornu, i ka cilësuar ngjarjet si “shumë serioze”, duke bërë të ditur se i dyshuari është arrestuar dhe ndodhet në paraburgim policor.
Prokuroria Kombëtare Kundër Terrorizmit e Francës ka marrë përsipër hetimin, i cili, sipas saj, lidhet me dyshimet për “vrasje në lidhje me një ndërmarrje terroriste”.
Kryetari i komunës së Trappes, Ali Rabeh, ka deklaruar se një person ka qëlluar me armë nga vetura ndaj disa njerëzve që ka hasur të premten në mëngjes.
Sipas mediave franceze, numri i të plagosurve mund të jetë më i lartë, ndërsa raportohet se në mesin e tyre mund të jetë edhe një fëmijë 12-vjeçar.
Në vendin e ngjarjes janë angazhuar forca të shumta policore dhe ekipe të emergjencës, ndërsa hetimet po vazhdojnë për të sqaruar rrethanat dhe motivin e sulmit.