Të mërkurën e 20 korrikut, është mbajtur konferenca për media e drejtuar nga Kryetari i Aleancës për Ardhmërinë e Kosovës (AAK), Ramush Haradinaj.
Haradinaj së bashku me kryetarët e pesë komunave, kanë themeluar forumin e kryetarëve të komunave të AAK-së.
“AAK ka vendosur të krijojë forumin e kryetarëve të komunave si një mekanizëm të adresimit të problemeve dhe të temave të qeverisjes në nivel komunal në raport me Qeverinë. Forumi do ta ketë udhëheqjen me rotacion, i pari do t’i prijë Ardian Gjini”- ka thënë Haradinaj.
Teksa e ka akuzuar qeverinë e udhëhequr nga kryeministri Albin Kurti, Haradinaj ka thënë se me arkën e shtetit nuk po kryhen shërbimet dhe se ka mungesë të investimeve në fushën e ekonomisë.
“AAK ka filluar një sërë takimesh me institucionet që merren me energjinë për shkak se kemi frikë se Kosova mund të shkojë në kolaps energjetik për shkak të krizës energjetike. Qeveria nuk është serioze dhe nuk ka një plan konkret se si do t’i qaset kësaj situate në prag të dimrit. Qeveria Kurti ka bllokuar Ligjin e Pagave, është bllokuar nisma e tërheqjes së mjeteve nga fondi i Trustit. Qeveria po i grumbullon paratë në arkën e shtetit, e nuk po i kthen në investim, në ekonomi, e që është shqetësuese”, u shpreh i pari i AAK-së.
Kritikues ndaj kësaj çështje u shpreh edhe kryetari i Gjakovës, Ardian Gjini.
“Ne e kemi të paraparë edhe me statut të kemi forumin e kryetarëve të komunave të AAK-së, për t’i shpalosur problemet dhe të ndahen përvojat tona. AAK është shumë e lumtur me punën që e kanë bërë kryetarët e komunave. Duhet të tregojmë që jemi pjesë aktive e Asociacionit të Komunave. Shqetësimet që ne i ndajmë besoj që të njëjtat i ndajnë edhe kryetarët e komunave të tjera”-kishte thënë Gjini.
Ndërkaq, kryetarët e komunave të tjera që udhëhiqen nga kjo parti, kanë kërkuar bashkëpunim më të madh midis qeverisjes qendrore dhe asaj lokale.