Policia e Kosovës ka bërë të ditur se do të përkujdeset për rendin, sigurinë e qetësinë publike, përgjatë vizitës së Presidentit të Shqipërisë, Bajram Begaj.
Përmes komunikatës, Policia e Kosovës ka njoftuar se do të bëjë ndërprerje të përkohshme të qarkullimit të trafikut (në intervale të shkurta kohore), në disa segmente rrugore ku pritet të kalojë eskorta, si dhe në lokacione të caktuara ku parashihen të realizohen aktivitete zyrtare.
“Policia e Kosovës, gjatë kësaj vizite do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë”, ka shkruar Policia e Kosovës.
Ndër të tjera, ajo ka bërë të ditur se për të mundësuar qarkullimin dhe riorientimin e trafikut në rrugë alternative në lokacionet ku pritet të kalojë eskorta, do të angazhohen zyrtarë policorë të njësiteve relevante.
Presidenti i Shqipërisë, Bajram Begaj, të hënën e 15 gushtit do të vijë në Kosovë për vizitë me ftesë të presidentes, Vjosa Osmani.
Kjo do të jetë vizita e parë zyrtare pas marrjes së mandatit si president i Shqipërisë.
Osmani, do të presë presidentin Begaj, me ceremonitë më të larta shtetërore.
Pas ceremonisë së pritjes, është planifikuar të zvillohet një takim mes dy krerëve të shteteve.