Deri në korrik të 2022 – tës, në gjithë vendin janë raportuar një mijë e 570 raste të dhunës në familje.
Kjo shifër, e ndarë në muaj, nxjerrë një mesatare të frikshme prej mbi 220 rastesh për muaj të rasteve të raportuara.
Viktima, sipas të dhënave që policia i ka dërguar Dukagjinit, rezulton se kanë qenë një mijë 324 gra e 280 burra.
Gjithë kjo situatë po shihet shqetësuse nga njohësit e fushës së sociologjisë.
“Në të dhënat e policisë e shohim se gratë janë më të atakuarat nga dhuna në familje por kjo nuk e mohon faktin që ka edhe meshkuj që atakohen po ashtu. Kjo zakonisht është parë si një marrëdhënie e ç’ekuilibruar dhe duke e ditur që jetojmë në shoqëri patriarkale pozita e grave në vend është aspak e favorshme në vend”, ka thënë Bleona Kurteshi – sociologe.
Ndërsa nga organizatat që merren me të drejtat e grave, më shqetësues e konsiderojnë trajtimin e rasteve të tilla në institucionet e drejtësisë.
“Ne akoma shohim gra të cilat raportojnë, qoftë nëpër media, qoftë nëpër organizata joqeveritare që kanë treguar për mënyrën se si ato janë trajtuar kur ato kanë raportuar rastet në polici apo shohim raste të vendimeve skandaloze të Gjykatave të Kosovës”, ka thënë Leonida Molliqaj – QIKA.
Sipas informatave të televizionit, për nga numri i rasteve të raportuara, në krye të listës janë rajoni i Mitrovicës, pasuar nga Peja, Gjakova e Prishtina.