Ministri i Punëve të Brendshme, Xhelal Sveçla, ka reaguar mbi deklaratën e presidentit serb, Aleksandër Vuçiq, se FSK-ja nuk mund të shkojë në veri pa pëlqimin e KFOR-it.
Sipas Sveçlës, presidenti serb ka gënjyer dhe se gjatë konferencës së tij, të dielën e 21 gushtit, ka pasur shtrembërime të qëllimshme.
“Ministri propagandues i Millosheviqit, Vuçiq në konferencën e sotme ka gënjyer për policinë e Kosovës. Një zotim nga e kaluara se Ushtria e Kosovës (FSK), nuk mund të shkojë në veri pa pëlqimin e KFOR-it është shtrembëruar qëllimisht. Policia e Kosovës është e autorizuar të sigurojë sundimin e ligjit dhe sigurinë për të gjithë qytetarët përreth Republikës së Kosovës”, ka shkruar ai.
Milosevic’s Min. of Propaganda, Vucic, at today's conf lied abt KP. A commitment from the past that the Kosova Army (KSF) cannot go to north without concurrence of COMKFOR is deliberately distorted. KP is authorized to secure rule of law & safety for all citizens all around RKS.
— Xhelal Sveçla (@XSvecla) August 21, 2022
Ministri i Punëve të Brendshme, Xhelal Sveçla, të shtunën e 20 gushtit së bashku me zëvendësministrin Bardhyl Dobra ka realizuar vizitat e rregullta në komunat veriore të Republikës së Kosovës.
Sveçla thotë se nga takimet e shumta me pjesëtarët e Policisë së Kosovës dhe KFOR-it kuptuan se situata në këto komuna është e qetë dhe stabile.
Ai ka shtuar se angazhimi i përditshëm i pjesëtarëve të Policisë së Kosovës është lehtësim dhe garancë për një jetesë më të mirë të banorëve të kësaj zone.
“Institucionet e Republikës së Kosovës do të vazhdojnë të sigurojnë lëvizjen e lirë për të gjithë qytetarët pa dallim, në përputhje me ligjet në fuqi”.
Ndryshe, presidenti i Serbisë, Aleksandër Vuçiq, ka thënë se Kosova ka dy synime e që janë shfuqizimi i shtetit serb në Kosovë dhe ‘dëbimi i serbëve’.
Pas takimit me përfaqësuesit e serbëve të Kosovës, Vuçiq ka thënë se Beogradi kishte propozuar targa me status neutral “KS” mirëpo, Kryeministri i Kosovës, Albin Kurti nuk është pajtuar dhe ka kërkuar që ato të jenë “RKS”.
“Kuptimi i gjithçkaje është se çfarëdo që ne pranojmë apo nuk pranojmë, ata refuzojnë gjithçka”, ka thënë Vuçiq.
Ai, gjithashtu, ka thënë se mesazhi i tij për Kosovën është se Serbia do të mbrojë popullin e saj në Kosovë kinse nga persekutimet, duke theksuar se nuk do të ketë refugjatë.
Fjalimi i Vuçiqit ishte paralajmëruar qysh pas dështimit të negociatave në Bruksel.
Të enjten në Bruksel për disa orë u mbajt takimi i nivelit të lartë në nivel të dialogut Kosovë-Serbi, mes kryeministrit të Kosovës, Albin Kurti dhe presidentit të Serbisë, Aleksandar Vuçiq me ndërmjetësimin e emisarit Miroslav Lajçak. Takimi përfundoi pa ndonjë marrëveshje rreth çështjeve që prodhuan tensione në terren, reciprocitetit në targa dhe dokumente të hyrje-daljes. Por përfaqësuesi i lartë i BE-së, Josep Borrell, tha se nuk do të dorëzohen dhe përpjekjet do të vazhdojnë.
Përderisa situata në veri të Kosovës është e qetë dhe stabile, misioni i NATO-s në Kosovë, KFOR, ditëve të fundit ka rritur prezencën në këtë pjesë të shtetit.