Pjesëtarët e pakicës kombëtare shqiptare nga komunat e Bujanocit, Preshevës dhe Medvegjës do të marrin pjesë në regjistrimin e ardhshëm të popullsisë, që do të nisë nga një shtatori.
Kështu ka bërë të ditur kryetari i Këshillit Kombëtar të Shqiptarëve, Ragmi Mustafa, për televizionin publik serb.
“Pres që përmes procesit të përzgjedhjes së inspektorëve dhe përmes procesit të përzgjedhjes së regjistruesve të plotësohen të gjitha kushtet që janë vendosur, të ketë regjistrues të shqiptarëve dhe formularët të jenë në gjuhën shqipe dhe të mundësojnë regjistrimin e të gjithë qytetarëve të Republikës së Serbisë, që do të thotë edhe qytetarëve të kombësisë shqiptare”, ka thënë Ragmi Mustafa, shkruan A2 CNN.
Pjesëmarrja e shqiptarëve në regjistrimin e popullsisë vjen pas bojkotit të censusit të vitit 2011.
Ky regjistrim shërben si kornizë për përcaktimin e fushës së të drejtave që ata kanë.
Sipas vlerësimeve të bashkësisë ndërkombëtare, në Serbi jetojnë rreth 60 mijë pjesëtarë të pakicës kombëtare shqiptare, kryesisht në komunat e Preshevës, Bujanocit dhe Medvegjës në jug të Serbisë.