Takimi midis presidentes së Kosovës, Vjosa Osmani, dhe përfaqësuesit Special të Shteteve të Bashkuara të Amerikës për Ballkanin Perëndimor, Gabriel Escobar dhe të dërguarit të posaçëm të Bashkimit Evropian për dialogun Kosovë-Serbi, Miroslav Lajçak, tashmë ka përfunduar.
Palët nuk kanë pranuar të deklarohen për media.
Pas këtij takimi, Escobar dhe Lajçak do të takohen edhe me kryeministrin Albin Kurti dhe zëvendëskryeministrin Besnik Bislimi.
Qëllim i vizitës së dy emisarëve është që të bisedojnë me palët për arritjen e një marrëveshjeje të mundshme, përpara një shtatorit.
Ndonëse ka mbetur edhe një javë kohë deri më një shtator, kur Qeveria e Kosovës do të nisë zbatimin e vendimeve për riregjistrim të automjeteve me targa serbe në RKS dhe lëshimin e dokumenteve hyrëse-dalëse për shtetasit serbë, tashmë veçse kanë filluar përpjekjet ndërkombëtare për të gjetur një zgjidhje.
Dyshja do të takohet edhe me liderët e partive opozitare në orën 16:00.
Pas këtyre takimeve, të enjten dy emisarët pritet të vizitojnë edhe pjesën veriore të vendit.