Të premten e 26 gushtit, përfaqësuesi i posaçëm i Bashkimit Evropian në dialogun Kosovë-Serbi, Miroslav Lajçak, pas takimit të së enjtes me presidentin e Serbisë, Aleksandër Vuçiq, ka thënë se pas një rundi të dytë të bisedimeve në Beograd, shpreson se janë në rrugën e duhur.
Lajçak përmes një postimi në Twitter, ka shkruar se i vlerëson përpjekjet e sinqerta të presidentit Vuçiq për t’u mbështetur në zgjidhje evropiane duke shtuar se “bisedimet do të vazhdojnë tutje”.
After a second round of discussions late last night, I hope we are on the right track. I appreciate @predsednikrs sincere effort to support a European solution. Our talks will continue.
— Miroslav Lajčák (@MiroslavLajcak) August 26, 2022
Ndërkaq, të enjten e 25 gushtit, Miroslav Lajçak, rundin e parë të diskutimeve me presidentin e Serbisë, Aleksandër Vuçiq, i ka cilësuar si të vështira.
Lajçak, ka njoftuar se presidentit serb i ka thënë se të gjitha marrëveshjet e arritura në Bruksel, në kuadër të dialogut Kosovë-Serbi, duhet të zbatohen.
Një marrëveshje, të cilën Lajçak e ka përmendur, është ajo për lirinë e lëvizjes të vitit 2011.
“Patëm një diskutim të vështirë, por me përgjegjshmëri me Aleksandër Vuçiq. I përcolla mesazhet dhe theksova se të gjitha marrëveshjet e Dialogut duhet të zbatohen, përfshirë edhe Marrëveshjen e vitit 2011 për Lirinë e Lëvizjes. Ne do të vazhdojmë bisedimet tona më vonë sonte”, kishte shkruar Lajçak në Twitter.
Zyrtarët e BE-së dhe SHBA-së, Miroslav Lajçak dhe Gabriel Escobar, të enjten kanë mbajtur takime me zyrtarët e lartë në Serbi.
Fillimisht, ata u takuan me drejtorin e ashtuquajtur të Zyrës për Kosovën nga Qeveria e Serbisë, Peter Petkoviq.
Më pas Lajçak, u takua me presidentin e Serbisë, Aleksandër Vuçiq, teksa më vonë atyre i është bashkuar edhe emisari amerikan, Gabriel Escobar.
Përfaqësuesi i posaçëm i Bashkimit Evropian në dialogun Kosovë-Serbi, Miroslav Lajçak, bashkë me të dërguarin e SHBA-së për Ballkanin Perëndimor, Gabriel Escobar, kishin qëndruar dy ditë në Kosovë, ku ishin takuar me krerët e Qeverisë së Kosovës, presidenten, dhe partitë opozitare.
Qëllimi i vizitës, sipas emisarëve, ishte që të shmangen tensionet në veri të Kosovës, dhe të normalizohen marrëdhëniet në mes të Kosovës dhe Serbisë.