Faruk Fatih Özer ishte në kërkim ndërkombëtar për mashtrim me kriptovaluta derisa të martën e 30 gushtit u arrestua nga Policia e Shqipërisë, teksa po merrte rreze dielli së bashku me një person tjetër me iniciale E.H, i cili ka rënë gjithashtu në prangat e policisë, pasi akuzohet se ka përkrahur atë të fshihet.
Faruk Ozer rezultoi të ishte futur në Shqipëri nga pika kufitare në aeroportin e Rinasit më 20 prill të vitit të shkuar, ndërkohë që kanë dalë edhe pamjet filmike nga momenti kur ai u akomodua në një prej hoteleve të kryeqytetit, nga një shtetas shqiptar, i cili ka deklaruar se nuk ishte në dijeni të veprës penale që kishte kryer biznesmeni turk, raporton ABC News.
Në bazë të të dhënave, ai ka ikur nga Turqia, pasi kishte mashtruar dhjetëra mijëra turq, të cilët i kishte bindur që t’i investonin paratë e tyre në monedhë virtuale turke “Thodex”.
Özer dyshohet se i kishte mashtruar turqit nëpërmjet një kompanie ku pasi kishte përfituar rreth dy miliardë dollarë e kishte shpallur atë të falimentuar.
I arrestuari Özer ishte arratisur nga Turqia më 20 prill të vitit të kaluar me 108 milionë dollarë, dhe dyshohej se po qëndronte prej asaj kohe në Shqipëri.