Presidentja e Kosovës, Vjosa Osmani, ka udhëtuar zyrtarisht për në Çeki ku do të zhvillojë një sërë takimesh me zyrtarë të lartë shtetërorë të Çekisë si dhe do të marrë pjesë në konferencën ndërkombëtare të Forumit 2000, së bashku me liderë të tjerë botërorë.
Kështu thuhet në njoftimin e zyrës së presidencës, ku theksohet se në kuadër të kësaj vizite, Osmani do të marrë pjesë dhe do të flasë në konferencën ndërkombëtare të Forumit 2000 me temë: Rreziku i qartë dhe i tashëm i demokracisë: si të përgjigjemi.
“Presidentja Osmani në këtë Konferencë do të mbajë dy fjalime si dhe do të marrë pjesë edhe në disa aktivitete të tjera. Çekia aktualisht udhëheq me presidencën e Këshillit të Bashkimit Evropian, prandaj në këto takime, presidentja e Kosovës do ta adresojë në veçanti çështjen e liberalizimit të vizave për Kosovën dhe avancimin e agjendës evropiane të vendit tonë”, thuhet në njoftim.
Presidentja Osmani do të takohet me kryeministrin çek Petr Fiala, me presidentin e Senatit Çek, Milos Vystrcil si dhe me kryeministrin, njëherësh ministër për punë të jashtme të Holandës, Wopke Hoekstra.
Fondacioni Forum 2000 vazhdon trashëgiminë e ish-presidentit çek, Vaclav Havel në mbështetje të vlerave demokratike, respektimit të të drejtave të njeriut, si dhe duke ndihmuar në zhvillimin e shoqërisë civile dhe inkurajuar tolerancën kulturore dhe etnike.