Në të gjitha pikat kufitare që çojnë nga Kosova në Serbi janë vendosur shënimet, në të cilat thuhet se mundësia e përdorimit të kartave të identitetit të Kosovës është bërë ekskluzivisht për arsye praktike.
Kjo për të lehtësuar qarkullimin e qytetarëve, dhe se nuk mund të interpretohet si njohje e pavarësisë së Kosovës, shkruan Tanjug.
Këto shënime janë vendosur në gjuhën serbe dhe angleze.
Ndryshe, Kosova dhe Serbia më 27 gusht kanë arritur marrëveshje për heqjen dorë nga lëshimi i dokumenteve për hyrje-dalje për qytetarët e dy vendeve.
Kjo marrëveshje nënkupton se qytetarët e Serbisë dhe ata të Kosovës, do të mund të kalojnë kufirin me kartat e tyre të identitetit, pa pasur nevojë që të pajisen me një letër shtesë të hyrje-daljes.
Këtë praktikë Serbia e kishte aplikuar qe 11 vjet, ndërkaq Kosova lëshoi dokumente të tilla për disa orë gjatë një gushtit të vitit 2022.
Dy vendimet, ajo për targat dhe dokumentet, çuan në rritje të tensionve midis Kosovës dhe Serbisë, që rezultuan me vendosjen e barrikadave në veri të Kosovës nga serbët lokalë më 31 korrik dhe 1 gusht.
Barrikadat u hoqën dhe Qeveria e Kosovës ishte zotuar për shtyrjen e zbatimit të vendimeve.
Por, pas një rundi të pasuksesshëm të dialogut, zyrtarët evropianë dhe ata amerikanë shtuan përpjekjet për të bindur palët që të arrinin ujdi.
Në këto përpjekje u angazhua edhe i dërguari i Shteteve të Bashkuara për Ballkanin Perëndimor, Gabriel Escobar.
Me kërkesë të SHBA-së, implementimi i vendimit të Qeverisë ishte shtyrë për datën një shtator, në të cilën pritet të hyjë në fuqi.