Ministri i Financave, Hekuran Murati, i ka ftuar organet e rendit ta hetojnë Sindikatën e Bashkuar të Arsimit, Shkencës dhe Kulurës(SBASHK), sepse sipas tij, ka diskrepancë në deklarimin e të hyrave të kësaj sindikate.
Në një konferencë për media, Murati është shprehur se në vitin 2017 nga anëtarësia e SBASHK-ut, janë dhënë mbi 550 mijë euro kurse sindikata në fjalë i ka deklaruar rreth 220 mijë.
Sipas tij, 330 mijë euro nuk janë deklaruar fare.
“Për vitin 2017, të hyrat nga anëtarësia që janë në llogari të SBASHKU-t, janë 550 mijë e 317 euro e 60 centë. SBASHK-u të hyra ka deklaruar 220 mijë e 136 euro e 54 centë bëhet fjalë për një diskrepancë prej 330 mijë euro”, ka thënë ai.
Në vitin 2018, sipas Muratit, janë deklaruar 353 mijë euro më pak, kurse në 2019, 371 mijë euro më pak të deklaruara.
Ai është shprehur se SBASHK-u nuk mund të arsyetohet se me ato mjete ka paguar trajnime, sepse sipas tij, mësimdhënësit ato i paguajnë me të hollat e tyre personale.
“Ftoj organet e rendit, t’i hetojnë që nëse është e vërtetë që kanë paguar pushime dhe trajnime paguajnë vetë, detyrohen vetë, në anën tjetër SBASHKU thotë se paret i kanë shpenzu për trajnime”.