+
Kryetari i Aleancës për Ardhmërinë e Kosovës, Ramush Haradinaj, e ka kritikuar kryeministrin e Kosovës, Albin Kurti, për pezullimin e pagesave për mësimdhënësit e shkollave publike.
Përmes disa pyetjeve retorike, Haradinaj është shprehur se kryeministri i Kosovës po i bën dëm vendit.
“Ku duke dashur ta dërgosh këtë vend o Albin Kurti?! A je duke e parë që je duke e shkatërruar me themel!? Me çfarë të drejte jua ndal pagat personelit arsimor? Me cilin ligj a me cilën kushtetutë? Kush janë ata sejmenë trima që i kërcënojnë e i shantazhojnë mësuesit!”, ka shkruar në Facebook, Haradinaj.
Tutje, Haradinaj e ka kritikuar të parin e qeverisë, se nuk po i menaxhon si duhet krizat, të cilat janë shfaqur së fundmi në vend.
“Kush ta ka dhënë atë të drejtë që në pikë të verës ta lësh popullin në terr! Pse e ke penguar ndërtimin e Kosovës së Re? Pse nuk i ke hapur rrugë gazit për energji? Pse po i mban paret e popullit në arkën e shtetit e nuk po i rrit rrogat. A ta ka thënë dikush se njerëzit kanë filluar të vuajnë edhe për bukë?”, ka vijuar ai.
Haradinaj i ka bërë thirrje Kurtit, që t’i “kthehet popullit”, sepse sipas tij, “po t’u kthyer ai ty, do të përfundosh me turp”.
Të mërkurën gjatë ditës, Minsitri i Financave, Hekuran Murati, ka bërë të ditur se punëtorëve të sektorit publik nuk i është procesuar paga e plotë. Fajin për këtë Murati ia ka lënë organizatave buxhetore komunale dhe qendrore, të cilat sipas tij, nuk i kanë dorëzuar me kohë listat e pagave të kërkuara nga ministria.
Murati ka bërë të ditur se të gjithë atyre punëtorëve që janë pjesë e grevës, do t’u pezullohet paga për aq ditë sa nuk dalin në punë.