Ministria e Industrisë, Ndërmarrësisë dhe Tregtisë (MINT) i ka publikuar çmimet maksimale apo “tavan” të naftës dhe derivateve të tjera për 24 orët e ditës së enjte të 1 shtatorit.
Në njoftim thuhet se çmimi i naftës, sipas masave të reja, rezulton të jetë 1.79 euro për litër, ndërsa çmimi i benzinës raportohet të jetë 1.44 euro për litër.
Ndërkaq, çmimi i gazit del të jetë 0.76 centë për litër.
Ndryshe, të mërkurën e 31 gushtit, Ministria e Industrisë, Ndërmarrësisë dhe Tregtisë e Kosovës (MINT) ka vendosur masa mbrojtëse për produktet e derivateve të naftës.
Duke u bazuar në vendimin e marrë, marzha tregtare maksimale e lejuar me shumicë është dy centë për litër, ndërsa çmimi maksimal i lejuar i shitjes me pakicë është 12 centë për litër naftë.
Në këtë vendim thuhet se Ministria e Industrisë ka monitoruar tregun e produkteve të naftës dhe çmimet e furnizimit nga importi.
Në bazë të raportit të Inspektoratit të Tregut, është evidentuar mospërputhja e çmimeve në Kosovë në krahasim me lëvizjet në tregjet botërore.
Vendimi i Ministrisë së Industrisë, Ndërmarrësisë dhe Tregtisë do të hyjë në fuqi për 30 ditë.
Në muajin qershor të këtij viti, Qeveria e Kosovës ka marrë vendim për caktimin e çmimit tavan vetëm për derivate të naftës, i cili ishte përcaktuar çdo 24 orë.
Sipas ministres së Industrisë, Rozeta Hajdari, për miratimin e udhëzimit për çmimin e lejuar maksimal të naftës ka mospërputhje mes çmimeve në tregun e Kosovës dhe lëvizjes së çmimeve në tregun botëror.
Ajo ka bërë të ditur se në lidhje me këtë çështje kanë diskutuar dhe janë informuar nga dogana dhe nga ATK-ja.
“Udhëzimi administrativ bëhet me qëllim që të mbrohet konsumatori dhe konkurrenca për të mënjanuar çrregullimet në treg. Në bazë të të dhënave që posedon MINT-i, të konfirmuara me evidencë nga bizneset, nga Dogana dhe ATK-ja, ka mospërshtatje të çmimeve vendore krahasuar me lëvizjet në tregun botëror”, ka thënë ajo.
Hajdari ka shtuar se mospërshtatja e çmimeve është një ndër shkaqet që Qeveria mund të përcaktojë çmimin maksimal të lejuar, apo të kufizimit të marzhës tregtare.
Qeveria vendos masa të reja mbrojtëse për produktet e naftës