Ka përfunduar takimi në mes të kryeministrit të Kosovës, Albin Kurti dhe Këshillit Grevist, të udhëhequr nga kryetari i Sindikatës së Arsimit, Rrahman Jasharaj.
Jasharaj bëri të ditur se përkundër tentimeve nuk pati dakordim me Qeverinë e Kosovës, në lidhje me ndaljen e grevës.
Jasharaj, po ashtu, ka thënë se nuk është pajtuar me kryeministrin Kurtin, i cili sipas tij nuk e ka konsultuar me sindikatat pakon e fundit për luftim të inflacionit.
“Temë e nxehtë ishte edhe pakoja, por ne insistuam që kjo shuma e përmendur që nuk është pranuar nga asnjë grevist të lëvizë. Ne ishim të gatshëm të bëjmë një kompromis të vogël për hir të situatës, por Qeveria mbeti te ajo shuma e proklamuar me pakon dhe në këtë situatë nuk ka arritje. E mira e kësaj është që filloi dialogu, uroj që kryeministri të mos i mbyllë dyert, të vazhdojmë me dialogun, mbase duke dëshiruar që gjendja të stabilizohet besoj që kryeministri me stafin e tij do të diskutojnë pas këtij takimi, sepse tashmë është në dorën e tyre se çfarë do të ndodhë tutje”, ka deklaruar Jasharaj.
Jasharaj është shprehur se sindikatat kishin për qëllim të arrihej kompromisi, por një gjë e tillë sipas tij nuk gjeti mbështetje nga qeveria.
Tutje, Jasharaj ka thënë se anëtarësia e sindikatave nuk do ta pranojë pakon e fundit të Qeverisë së Kosovës.
“Nëse nuk lëviz qeveria në realizimin e kërkesave tona, dialogu quhet i thatë, pa rezultate. Asgjë e re nuk ndodhi, asnjë lëvizje që do të na ndihmonte në kalimin e kësaj situate. Anëtarësia edhe njëherë do t’i thotë jo pakos”, ka thënë ai.
Sipas, tij, Qeveria e Kosovës është arsyetuar me atë se do të jetë një dimër i vështirë.
“Arsyetimi i tyre ishte i zakonshëm se kanë bërë pakon, se dimri do të jetë i vështirë, dhe pikërisht kur dimri do të jetë i vështirë shtohet arsyeja e kërkesës sonë që të ndihmohen njerëzit në sektorin publik për ta përballuar më lehtë dimrin. Kjo ndihmesë për momentin nuk po shtohet”, ka thënë Jasharaj.
Në pyetjen e gazetarëve nëse kryeministri ka lëshuar pe në ndonjë pikë, përgjigjja e Jasharajt ishte e shkurtër “Jo!”
Kryetari i Sindikatës së Arsimit ka thënë se shpreson që takime të ngjashme të vazhdojnë edhe ditëve në vijim.