Kryeministri Kurti ka zhvilluar sot një takim të paparalajmëruar me kryeministrin e Shqipërisë, Edi Rama.
Në një përgjigje për Portalin Dukagjini, Zëdhënësi i Qeverisë së Kosovës, Përparim Kryeziu ka thënë se theks të veçantë në takim patën sfidat energjetike si dhe shkëmbimi i energjisë në mes Korporatës Energjetike të Kosovës dhe Korporatës Energjetike të Shqipërisë.
“Përgjatë këtij takimi dy kryeministrat kanë diskutuar për çështjet e politikave publike e qeveritare dhe socio-ekonomike në Kosovë e Shqipëri, me theks të veçantë në sfidat energjetike dhe shkëmbimin që po bëjnë KEK me KESh”, ka deklaruar Kryeziu.
Kryeministri Kurti ishte takuar me homologun e tij nga Shqipëria, Ramën në Tiranë, takim ky i cili kishte zgjatur prej afro 90 minutash.
Një takim i tillë në mes Kurtit dhe Ramës nuk ishte paralajmëruar.
Në një konferencë për media pas takimit me Këshillin Grevist të martën, Kurti lajmëroi se duhej të largohej për disa takime urgjente. Më vonë, i njëjti ka udhëtuar drejt Tiranës për t’u takuar me homologun e tij.
Ndërkaq, gjatë ditës së martë, po në këtë ditë që Kurti e vizitoi Ramën, ka ndodhur një sulm kibernetik në Telekomin e Kosovës. Këtë e ka konfirmuar për Portalin Dukagjini drejtori teknik i Telekom-it, Halil Krasniqi.
Krasniqi ka bërë të ditur se janë në dijeni për llojin e këtij sulmi, por këtë nuk mund ta tregojnë për publikun për arsye të sigurisë.
Ditë më parë si Kosova, ashtu edhe Shqipëria ishin cak i sulmeve kibernetike. Sulmet në Shqipëri, tashmë është konfirmuar se kanë ardhur nga shteti i Iranit, me ç’rast, Shqipëria i ka ndërprerë të gjitha marrëdhëniet diplomatike me shtetin në fjalë.
Po ashtu, ditë më parë të dy qeveritë, ajo e Kosovës dhe e Shqipërisë e kishin përuruar Abetaren e përbashkët për të dyja vendet.