Komisioni Evropian ka miratuar “Aktin Evropian për Lirinë e Medias”, një grup i ri rregullash, për të mbrojtur pluralizmin dhe pavarësinë e medias në Bashkimin Evropian.
Lajmi u bë i ditur nga institucioni i lartë evropian.
Rregullorja e propozuar përfshin, gjithashtu, masa mbrojtëse kundër ndërhyrjeve politike në vendimet editoriale dhe kundër mbikëqyrjes.
Rregullorja thekson pavarësinë dhe financimin e qëndrueshëm të medias publike, si dhe transparencën e pronësisë së medias dhe shpërndarjes së reklamave shtetërore.
Projektligji përcakton edhe masat për mbrojtjen e pavarësisë së redaktorëve dhe zbulimin e konflikteve të interesit.
Në fund të fundit, ligji do të trajtojë çështjen e përqendrimit të medias dhe do të krijojë një Këshill të ri të pavarur Evropian të Shërbimeve Mediatike.
Ky i fundit, do të përfshijë përfaqësues të organeve kombëtare të medias.
KE-ja miratoi gjithashtu një rekomandim shtesë për të inkurajuar garancitë e brendshme të pavarësisë editoriale.
“Vitet e fundit kemi parë forma të ndryshme presioni ndaj medias. Ka ardhur koha për të vepruar. Ne duhet të vendosim parime të qarta: asnjë gazetar nuk duhet të spiunohet për shkak të punës së tij; asnjë media publike nuk duhet të kthehet në një kanal propagande. Kjo është ajo që ne sot propozojmë për herë të parë: garanci të përbashkëta për mbrojtjen e lirisë së medias dhe pluralizmit në BE”, tha zëvendëspresidentja për vlerat dhe transparencën Vera Yurova.
Sipas komisionerit evropian për Tregun e Brendshëm, Thierry Breton, “Akti Evropian për Lirinë e Medias” ofron garanci të përgjithshme në nivel të BE-së.
Kjo, për të garantuar pluralizmin e zërave dhe aftësinë e medias për të vepruar pa asnjë ndërhyrje, qoftë private apo shtetërore.
“Organi i ri rregullator evropian do të lehtësojë zbatimin efektiv të këtyre rregullave të reja për lirinë e medias dhe përqendrimin e mediave në ekran, në mënyrë që ato të mos pengojnë pluralizmin”, shtoi ai.
Ligji evropian për lirinë e medias siguron që mediat publike dhe private të mund të punojnë më lehtë përtej kufijve në tregun e brendshëm të BE-së, pa presione të panevojshme, dhe duke marrë parasysh transformimin digjital të hapësirës mediatike.
Parlamenti Evropian dhe vendet anëtare duhet të diskutojnë tani propozimin e Komisionit Evropian për një rregullore sipas procedurës normale legjislative.
Pasi të miratohet, ai do të jetë drejtpërdrejt i zbatueshëm në të gjithë Bashkimin Evropian.
Sipas “Reporterëve pa Kufij”, liria e shtypit është përkeqësuar edhe në vende të tjera evropiane kohët e fundit.
Greqia është anëtarja e BE-së me vlerësimin më të ulët për lirinë e shtypit.
Disa vende të BE-së aktualisht nuk kanë rregulla kombëtare për të mbrojtur gazetarët nga kontrolli shtetëror.