Kryeministri i Kosovës, Albin Kurti, njëherësh kryetar dhe kandidat për kryetar të Lëvizjes Vetëvendosje ka përfunduar votimin në zgjedhjet e brendshme të LVV-së.
Zgjedhjet e brendshme të Lëvizjes Vetëvendosje kanë filluar nga ora 10:00 e mëngjesit të së dielës së 25 shtatorit dhe do të vazhdojnë deri në orën 19:00.
“Viti 2022 është vit i zgjedhjeve. Le të bëhemi më të mirë se vetja. Gratë votojnë për gratë, të rinjtë votojnë për rininë, të gjithë votojmë për VETËVENDOSJE!-n. Përcaktohemi për udhëheqje progresiste për katër vjetët e ardhshme: përveçse për kryetar të LVV, kësaj radhe edhe për kryetare të GVV e kryetar të RVV”, ka shkruar Kurti gjersa ka ftuar anëtarët e LVV-së të votojnë.
Kryeministri Kurti ka përfunduar votimin e tij e krahas tij, edhe Ministrja e Drejtësisë, Albulena Haxhiu.
Përmes një postimi në Facebook, Haxhiu e ka cilësuar këtë ditë sikurse “ditë e demokracisë në Lëvizjen VETËVENDOSJE!,”.
Ajo ka ftuar të gjithë anëtarët ta shfrytëzojnë të drejtën e votës, duke u bërë pjesë e procesit të vendimmarrjes.
Në këto zgjidhje ka votuar edhe Kryetari i Kuvendit të Kosovës, Glauk Konjufca. I njëjti nuk ka kandiduar për ndonjërën pozitë.
Për herë të parë këtë vit, LVV do të formojë organizatën e gruas me kandidate për kryetare Ministren Haxhiu si dhe RVV-në, Organizatën e të Rinjve për Vetëvendosje.
Ndër të tjera, Kurti nuk ka kundërkandidat në këto zgjedhje.