Sëmundja e kancerit është sëmundje e paparashikueshme.
Kështu theksoi onkologu Ilir Kurtishi, gjatë intervistës në emisionin “Radar” me Edita Doli, në Radio Dukagjini.
Ai shtoi se mund të jesh mirë, por për 2-3 ditë mund të ndryshojë gjithçka dhe kjo nuk është aspak e lehtë as për stafin mjekësor.
Sipas Kurtishit, duhet të kesh fat që të mos atakohesh nga kjo sëmundje, pasi kjo mund të jetë gjenetike.
Kurtishi rekomandon që të mos konsumohet duhani e alkooli, e një rol të rëndësishëm e ka edhe kequshqyerja dhe ekspozimi ndaj rrezeve ultravjollce dhe gjithsesi të bëhen kontrollet rutinë.
Dr.Kurtishi ka folur edhe për rastet kur pacientëve që diagnostikohen me kancer duhet t’u kumtohet lajmi se duhet nisur me trajtimet shëndetësore.
“Pacienti parapërgatitet që duhet të marrë ilaçet të cilat mund të ndryshojnë edhe fizikun. Disa e pranojnë disa më jo, por në fund të gjithë pajtohen që të futen në terapinë e rëndë për të mbijetuar. Dhe këta për mua janë heronj të gjallë”, ka thënë Kurtishi.
Onkologu Iliri Kurtishi, e konsideron si problematikë të Kosovës, dukurinë që pacientët të cilët janë në gjendje të rëndë shëndetësore me këtë sëmundje, trajtohen në të njëjtin vend me pacientët e sapo diagnostikuar.
Nga kjo sëmundje jemi mësuar të lexojmë më shumë raste të dështimeve, por sipas Kurtishit në krahasim me vitet e fundit numri i rasteve të sëmundjes te fëmijët është më i vogël dhe numri i të shëruarve viteve të fundit është në rritje dhe kjo neve na bënë të lumtur dhe është shtysë për të ecur përpara.
Dr. Kurtishi në fund ka përmendur edhe disa raste që nuk kanë pasur fare shpresë për shërim, por falë tij dhe trajtimeve në QKUK, sot janë shëndoshë e mirë duke i realizuar të gjitha planet jetësore.