Presidenti i Shteteve të Bashkuara të Amerikës (SHBA), Joe Biden po hedh akuza mbi presidentin e Rusisë, Vladimir Putin për “gjenocid”, duke thënë se Putin po përpiqet të “fshijë idenë e të qenët ukrainas”.
“Po, e quajta gjenocid. Gjithnjë e më i qartë është bërë edhe fakti që Putin po përpiqet të fshijë idenë e të qenët ukrainas”, iu tha Biden gazetarëve në lowa, të martën pak para se të shkonte në “Air Force One” për t’u kthyer në Washington.
Pranimi vjen, kur Shtëpia e Bardhë debaton se sa duhet të përfshihet në hetimin e mizorive ruse nga Gjykata Penale Ndërkombëtare në Hagë, transmeton “Mail Online”.
Ekipi i Biden dëshiron të shohë Putinin dhe shefat e tij ushtarakë të mbajnë përgjegjësi për tmerret e luftës. Shumë besojnë se gjykata e ngritur për të ndjekur krimet e luftës, krimin kundër njerëzimit dhe gjenocidin, të jetë në gjendje të sigurojë drejtësi.