Këtë të shtunë u shënua 25-vjetori i protestës së studentëve më 1997. Kjo ditë u përkujtua nga shumë liderë politikë, ndër ta edhe nga presidentja Vjosa Osmani.
Presidentja Vjosa Osmani ka thënë se 25 vjet më parë ka filluar ndryshimi i historisë.
“Në krye me rektorin Ejup Statovci, studentët nisën rezistencën kundër padrejtësisë, refuzimin kundrejt dhunës dhe qëndresën kundër tiranisë”, ka thënë Presidentja Osmani, njofton Presidenca.
Osmani ka shtuar se “25 vjet më parë, ata nisën ndryshimin e historisë. Protesta e 1 tetorit të vitit 1997, ishte paralajmërim i hershëm për lirinë”.
Më tej, Osmani ka thënë se zëri protestues i studentëve ishte thirrje kundër diskriminimit të shqiptarëve nga regjimi gjenocidal serb jo vetëm në fushën e arsimit.
Osmani ka përfunduar duke shtuar se protesta e 1 tetorit të vitit 1997, është simbolika më e fuqishme në luftën për liri, referencë përmbajtësore për kauzën kombëtare dhe ngjarja më e shndritshme në historinë më të re.