Të martën e katër tetorit, një person ka ndërruar jetë si pasojë e një aksidenti trafiku në komunën e Obiliqit.
Policia e Kosovës ka njoftuar se një person ka goditur me automjet një grua së cilës i ka shkaktuar lëndime vdekjeprurëse.
Sipas raportit 24-orësh të policisë thuhet se tashmë i dyshuari është arrestuar.
“Është arrestuar i dyshuari mashkull kosovar pasi i njëjti duke drejtuar automjetin nga pakujdesia ka goditur viktimën femër kosovare së cilës i ka shkaktuar lëndime vdekjeprurëse”, thuhet në njoftim.
Me vendim të prokurorit trupi i pajetë i viktimës është dërguar në Institutin e Mjekësisë Ligjore për obduksion, ndërsa i dyshuari është dërguar në mbajtje.
Siç thuhet në njoftim rasti është në procedurë hetimore.
Ndërkaq sipas statistikave të përgjithshme të policisë, brenda 24 orëve të fundit, janë gjithsej 45 aksidente trafiku.
Një prej tyre ka përfunduar me fatalitet, 18 nga to kanë përfunduar me të lënduar dhe 26 të tjera me dëme materiale.
Ndërsa janë dy mijë e 117 tiketa të trafikut të shqiptuara nga Policia e Kosovës.