Kryetari i Lidhjes Demokratike të Kosovës, Lumir Abdixhiku, ka reaguar pas përfundimit të takimit të thirrur nga kryeministri në detyrë, Albin Kurti, me liderët e partive politike, takim që synonte gjetjen e një zgjidhjeje për tejkalimin e ngërçit institucional. Abdixhiku e ka cilësuar mbledhjen si një veprim të inskenuar pa asnjë vullnet real për kompromis.
“Një farsë publike. Qëndrimet e deputetit Kurti ishin të njëjta, as nuk e respektonin vendimin e Gjykatës Kushtetuese,” ka deklaruar ai. Sipas Abdixhikut, Kurti nuk tregoi gatishmëri për të ndryshuar qëndrimet e tij, duke e bërë takimin të pavlefshëm. “Kurti s’lëvizi nga pozicionet e tij, takimi ishte farsë publike,” theksoi Abdixhiku.