Kryetari i Lidhjes Demokratike të Kosovës, Lumir Abdixhiku, pas lirimit të tre policëve kosovarë nga shteti serb, ka shprehur mirënjohjen për lirimin e tyre dhe ka falënderuar miqtë ndërkombëtarë, veçanërisht Qeverinë e Shteteve të Bashkuara të Amerikës, për angazhimin dhe presionin e tyre për të siguruar lirimin e menjëhershëm të policëve.
Abdixhiku ka theksuar se lirimi i tre policëve është një lajm i mirë për të gjithë qytetarët e Kosovës.
Ai ka vlerësuar përpjekjet e miqve ndërkombëtarë dhe Qeverisë së SHBA-së për t’i dënuar veprimet agresive të Serbisë dhe për të shtuar presionin për lirimin e tyre.
Kreu i LDK-së ka theksuar se sjelljet agresive e luftënxitëse të Serbisë duhet të dënohen nga komuniteti ndërkombëtar dhe se koordinimi i veprimeve të institucioneve të Kosovës me aleatët është shumë i rëndësishëm në këtë kontekst.
Lirohen tre policët e kidnapuar nga Serbia
Tre policët e Kosovës janë liruar këtë të hënë pas seancës gjyqësore në gjykatën e Kralevës në Serbi.
Sipas avokatëve mbrojtës në këtë seancë, Gjykata e Lartë e Kralevës ka konfirmuar Aktakuzën e Prokurorisë së Lartë të Kralevës ndaj tre oficerëve policorë, ku ngarkoheshin për kryerjen e veprës penale “prodhim, mbajtje dhe qarkullim ilegal i armatimit dhe mjeteve shpërthyese,” sipas nenit 348, paragrafi 4, të lidhur me paragrafin 2 dhe 1 të Kodi Penal të Serbisë.
Rifat Zeka, Beqir Sefi dhe Shem Mustafa ishin kidnapuar nga forcat serbe më 14 qershor brenda territorit të Kosovës.
Atyre iu shqiptua masa e paraburgimit më 16 qershor, por nuk ishte e qartë kohëzgjatja e saj.
Policët ishin patrullues kufitarë dhe kryenin detyrën e tyre në një pikë statike në territorin e Kosovës, për të parandaluar kalimin e grupeve kriminale dhe kontrabandën, duke përfshirë dyshime për armatim në atë zonë.
Lexo edhe: Policia e Kosovës publikon hartën e pozicionimit të policëve që u rrëmbyen nga Serbia
Shtetet e Bashkuara, Gjermania dhe Mbretëria e Bashkuar i kanë bërë thirrje vazhdimisht Serbisë që t’i lirojë pa kushte policët.