Policia e Afrikës së Jugut ka arrestuar 11 persona në lidhje me të shtënat e së dielës në një lokal, ku humbën jetën 10 persona.
Mes të arrestuarve ka edhe disa të dyshuar si minatorë pa dokumente.
Sipas autoriteteve, në mesin e të arrestuarve të mërkurën janë nëntë shtetas të Lesotos dhe një nga Mozambiku. Arrestimet u kryen pasi policia dhe forcat e sigurisë bastisën dy shtëpi në periferi të Johanesburgut, shkruan Aljazeera, transmeton Dukagjini.
Në sulmin e së dielës, rreth një duzinë personash të armatosur, që udhëtonin me një minibus dhe një makinë, sulmuan një tavernë në lagjen Bekkersdal.
Përveç viktimave, 10 persona të tjerë u plagosën. Vitet e fundit, Afrika e Jugut ka përjetuar disa sulme masive në bare, të njohura ndryshe si “shebeens” ose taverna.
Policia tha se të dyshuarit u gjetën në posedim të armëve pa leje, përfshirë katër pistoleta dhe një pushkë automatike AK-47.
Ndërkohë, sipas mediave lokale, të martën pronarja e lokalit, Nonesi Matwa, u akuzua për mashtrim dhe për operimin e një pike të paligjshme të shitjes së alkoolit.
Zonat në perëndim të Johanesburgut, si Bekkersdal, të rrethuara nga puse minierash të braktisura, njihen për aktivitetet e paligjshme të nxjerrjes së mineraleve. Këto veprimtari kanë sjellë probleme serioze, përfshirë dhunën e bandave dhe përhapjen e armëve ilegale.
Me gati 26 mijë vrasje në vitin 2024, ose mbi 70 në ditë mesatarisht, Afrika e Jugut renditet ndër vendet me normën më të lartë të vrasjeve në botë.
Armët e zjarrit janë shkaku kryesor i këtyre vdekjeve. Edhe pse vendi ka ligje relativisht të rrepta për kontrollin e armëve, autoritetet thonë se shumica e vrasjeve kryhen me armë ilegale.
Sulm i armatosur në një tavernë në Afrikën e Jugut, vriten nëntë persona