Asociacioni i Gazetarëve të Kosovës (AGK), ka dënuar fuqishëm gjuhën e papërgjegjshme, sulmuese dhe shumë të rrezikshme të anëtarit të Komisionit Qendror të Zgjedhjeve, Sami Kurteshi, nga partia politike Vetëvendosje.
AGK-ja, nëpërmjet një njoftimi, i ka thirrje liderit të Lëvizjes Vetëvendosje, Albin Kurtit dhe Presidentes së Kosovës, Vjosa Osmani që ta konsiderojnë largimin e Kurteshit nga pozicioni i tij në KQZ, njofton Dukagjini.
“Kurteshi, në një reagim publik, e quajti AGK-në “Aleancë të Grupeve Kriminale” dhe listoi një sërë mediash, që sipas tij operojnë si “vrasës me pagesë”. Këto akuza, përveç që janë të pabaza, paraqesin rrezik real për sulme të mundshme në të ardhmen ndaj gazetarëve dhe pjesëtarëve të mediave në punën e tyre profesionale në terren. Deklaratat nxitëse të urrejtjes të z. Kurteshi janë vazhdimësi e një fushate linçuese ndaj gazetarëve, me qëllim frikësimin e tyre dhe minimin e lirisë së medias në vend”.
“AGK-ja e fton Vetëvendosjen, liderin e saj Albin Kurti dhe Presidenten e Republikës, Vjosa Osmani, që të konsiderojnë largimin e Kurteshit nga pozicioni i tij në Komisionin Qendror të Zgjedhjeve”, thuhet në njoftimin e AGK-së.