“Komunat e Kosovës pritet që ta dërgojnë Ligjin për Tatimin në Pronë në Gjykatën Kushtetuese”.
Kështu ka bërë të ditur Asociacioni i Komunave të Kosovës (AKK).
Sipas AKK-së, me miratimin e këtij Ligji në Kuvendin e Kosovës, komunat do të humbin me dhjetëra miliona euro dhe miratimi i tij pa konsulta paraprake me komunat e ka cenuar autonominë lokale financiare.
“Duke u bazuar në Kushtetutën e Kosovës, ku thuhet që palët e autorizuara për ngritjen e rasteve në Gjykatë janë edhe Komunat, atëherë Bordi i AKK-së duke marrë parasysh që komuna si Institucion shtetëror është e autorizuar që të kontestojë kushtetutshmërinë e ligjeve dhe akteve ligjore, i rekomandon komunat që ta dërgojnë këtë Ligj në Gjykatën Kushtetuese për interpretimin e tij Kushtetues”, thuhet në njoftim.
AKK-ja tutje thotë se me këtë ligj janë cenuar rëndë përgjegjësitë komunale dhe se ky ligj ka ndikim të drejtpërdrejtë në zvogëlimin e të hyrave të komunave, afektim në projektet kapitale dhe debalancim në mes të projeksioneve investuese dhe të të hyrave vetanake, si të hyrat kryesore të pushtetit lokal.
Sipas njoftimit, Ministria e Financave mori vendim që ta ndryshojë Ligjin mbi Tatimin në Pronën e Paluajtshme, ku gjatë procesit të amendamentimit nuk i konsultoi fare komunat e Kosovës.
“Kryetarët e Komunave dhe Asociacioni i Komunave të Kosovës (AKK) ka kërkuar nga niveli qendror që të konsultohet sa i përket amandamentimit të këtij ligji sepse ky ligj i prek në mënyrë të drejtpërdrejtë buxhetet e Komunave. Pastaj, MFTP-ja e dërgoi për miratim në Qeverinë e Republikës së Kosovës këtë projekt ligj pa konsulta me Komunat. Qeveria e miratoi si të tillë dhe e procedoi për miratim në Parlamentin e Republikës së Kosovës”, thuhet në njoftim. “As Parlamenti i Kosovës nuk e diskutoj këtë projekt ligj me Komunat dhe më procedura të përshpejtuara e miratoi edhe në lexim të dytë. Në këtë ligj, në Kapitullin II / Falja e Tatimit në Pronë për vitin tatimor 2023 Neni 11/B thuhet që: Pika 1. Shuma e faljes së Tatimit në Pronë për të gjithë tatimpaguesit lejohet deri në lartësinë e faturës së Tatimit në Pronë për vitin 2023, por jo më shumë se njëqind (100) euro në pajtim me dispozitat e këtij kapitulli. Pika 2. Vendimi për faljen e Tatimit në Pronë merret nga Kuvendi i Komunës i çdo komune më së largu 30 ditë nga hyrja në fuqi e këtij ligji, sipas kufizimit të përcaktuar në paragrafin 1 të këtij neni”, thuhet në reagim.
Ndryshe, të martën, drejtori i AKK-së, Sazan Ibrahimi, ka bërë të ditur se janë duke e shqyrtuar si mundësi që ligjin amendamentues për tatimin në pronë ta dërgojnë në Gjykatën Kushtetuese.
“Ne si bord e shqyrtuam mundësinë që ndoshta të fillojmë procedurat që ligji i amandamentuar për tatimin në pronë të procedohet në Kushtetuese”, ka deklaruar ai.
Ibrahimi: Po e shqyrtojmë mundësinë që ta procedojmë ligjin për tatimin në pronë në Kushtetuese