Pesë persona kanë pësuar lëndime si pasojë e një aksidenti trafiku, i cili ka ndodhur të mërkurën rreth orës 08:45, në magjistralen Prishtinë-Mitrovicë.
Lajmin për Portalin Dukagjini e ka bërë të ditur zëdhënësi i Policisë së Kosovës për rajonin e Prishtinës, Agron Borovci.
Po ashtu, sipas tij, në aksident janë përfshirë dy vetura, ndërsa të lënduarit kanë marrë trajtimin e nevojshëm mjekësor.
“Rreth orës 08:45, është pranuar informata për një aksident trafiku rrugor të ndodhur në rrugën magjistrale Prishtinë – Mitrovicë. Në aksident janë përfshirë dy vetura, ndërkaq pesë persona kanë pësuar lëndime trupore. Të njëjtit kanë marrë trajtimin e nevojshëm mjekësor”, ka thënë Borovci.
Ndërsa, ai ka thënë se njësia rajonale e trafikut ka dalë në vendin e ngjarjes dhe po ndërmerr veprimet e nevojshme për zbardhjen e shkaqeve që kanë sjellë deri te aksidenti.
Gjithashtu, të martën e 11 tetorit, kanë ndodhur dy aksidente me gjashtë të lënduar gjithsej, në rrugën Pejë-Klinë dhe në rrugën Prishtinë-Ferizaj.