Gjykata Themelore në Prishtinë, në rigjykim, e ka dënuar me 13 vjet burgim Muhamet Alidemajn, i akuzuar për krime lufte në masakrën e Izbicës gjatë vitit 1999. Në gjykimin e parë, Alidemaj ishte dënuar me 15 vjet burgim, por Gjykata e Apelit e kishte kthyer rastin në rigjykim.
Aktgjykimi u shpall të hënën nga kryetari i trupit gjykues, Vesel Ismaili.
Sipas aktakuzës, Alidemaj kishte marrë pjesë bashkë me pjesëtarë të forcave policore dhe ushtarake serbe në vrasjen e civilëve shqiptarë në masakrën e Izbicës, e ndodhur në mars të vitit 1999, ku u vranë dhe u masakruan 130 shqiptarë. Nga viktimat, 114 janë identifikuar, ndërsa 12 civilë kishin arritur t’i mbijetojnë ekzekutimit.
Në aktakuzë thuhet se gjatë periudhës 24 mars – 11 qershor 1999, Alidemaj, si pjesëtar i forcave policore dhe ushtarake serbe, në bashkëkryerje me persona të tjerë, kishte ndarë me dhunë gratë dhe fëmijët, duke i detyruar të largohen në drejtim të Shqipërisë, ndërsa burrat e mbetur ishin ekzekutuar me armë automatike.
Sipas prokurorisë, trupat e viktimave ishin zhvarrosur rreth dy muaj pas masakrës dhe ishin transportuar në lokacione të panjohura. Pas luftës, ato u gjetën në varreza masive në Batajnicë të Serbisë, si dhe në fshatrat Suhodoll të Mitrovicës dhe Novolan të Vushtrrisë.
Ndryshe, në gjykimin e parë, Gjykata Themelore kishte shpallur aktgjykim refuzues për pikën e dytë të aktakuzës, e cila lidhej me zhvarrosjen e trupave me ekskavator, pasi prokuroria ishte tërhequr nga kjo pjesë për mungesë provash.
Alidemaj ishte deklaruar i pafajshëm si në gjykimin e parë më 29 prill 2022, ashtu edhe gjatë seancës së rigjykimit më 23 tetor 2025.