Ridvan Aliu, prodhuesi i dronëve dhe përfaqësuesi i kompanisë që qëndron pas projektit “Skifteri”, ka mohuar pretendimet se videoja e publikuar, ku thuhet se droni “Skifter K1” ka goditur një cak në mbi 1000 kilometra largësi, i përket një kompanie kineze dhe është përdorur më herët për promovimin e një fluturake tjetër.
Në një linjë direkte në Debat Plus, Aliu tha se këto pretendime janë të pavërteta dhe i cilësoi ato si “fake news”, duke theksuar se videoja është autentike dhe e realizuar nga ekipi i tyre.
“Këto janë krejt fake news. ‘Skifteri’ është ndërtuar në Kosovë nga studentët tanë. Ato do të testohen çdo muaj. Është video autentike e ekipës sonë jashtë Kosovës, nuk është video kineze”, tha Aliu.
Ai sqaroi se testimi i videos që ka nxitur reagime të shumta nuk është realizuar në Kosovë, por jashtë vendit, ndërsa refuzoi të tregojë lokacionin, duke u arsyetuar se klienti i tyre nuk ka dashur të bëhet publik.
“Nesër e promovojmë një video e cila u tregon studentëve si ta ndërtojnë një fluturake më të sofistikuar se ‘Skifteri’, e cila do të testohet nga një nga shtetet e BE-së. Nuk u bë në Kinë, nuk kallxojmë ku është klienti”, deklaroi ai.
Aliu shtoi se kompania e tij ka mbi 100 punëtorë dhe funksionon përmes disa njësive të ndryshme.
“Kompania jonë me ‘Skifterin’ ka përmbi 100 punëtorë. Kemi entitete të ndryshme, mbi nëntë kompani, me kë punojmë është tjetër gjë”, u shpreh ai.
Në fund, Aliu theksoi se bashkëpunimi i kompanisë realizohet vetëm me shtete aleate të Kosovës dhe jo me vende që konsiderohen armiqësore.