Analisti nga Shqipëria, Ben Andoni, në një lidhje direkte në emisionin “FIVE” në RTV Dukagjini, për shpalljet e zgjedhjeve në Serbi nga Vuçiq ka thënë se presidenti serb do që të fitojë kohë, sepse sipas tij, tashmë gjendet para një realiteti që duhet ta njohë Kosovën defacto.
“Këto zgjedhje po i japin pak më shumë oksigjen Vuçiqit, i cili ka gati fitoren në këto zgjedhje”, ka thënë Andoni.
Andoni ka thënë se është një paradoks në pjesën e “dokumentimit sllav të dialogut”.
“Ka një paradoks shumë të madh në gjithë pjesën e dokumentimit sllav të dialogut për arsyen e vetme që një vend që është futur në dialog më shumë se një dekadë dhe të thotë që nuk e njoh Kosovën e dialogun është një paradoks i madh”, ka thënë ai.
Sipas tij, këtu tregohet edhe paqartësia ideologjike e partisë së Vuçiqit.
Analisti nga Shqipëria është shprehur se i ka bërë përshtypje dhe e sheh më shumë shqetësim, faktin që në buxhetin e Serbisë, këtë vit, për Kosovën janë ndarë më shumë para se vitin e kaluar.
Presidenti i Serbisë, Aleksandër Vuçiq, të mërkurën ka nënshkruar vendimin për shpalljen e zgjedhjeve të jashtëzakonshme parlamentare më 17 dhjetor.
Të dielën e 17 dhjetorit do të mbahet votimi për mbledhjen e re të Kuvendit të Serbisë, shkruan gazeta serbe, “Danas”.
Lexo dhe: Zgjedhjet e jashtëzakonshme parlamentare në Serbi më 17 dhjetor
Në të njëjtën ditë do të mbahen zgjedhjet lokale në 65 qytete dhe komuna të Serbisë, të cilat i shpalli sot kryetari i Kuvendit, Vladimir Orliq.
Vuçiq ka nënshkruar dekretin për shpërndarjen e Kuvendit, i cili hyn në fuqi ditën e botimit në gazetën zyrtare.