Kishte qenë ish-përzgjedhësi i Kombëtares së Kosovës, Alain Giresse, i cili në një konferencë për media disa muaj më parë kishte thënë se Muja ka kërkuar garanci që të luajë titullar në ndeshjet ndaj Rumanisë dhe Bjellorusisë.
Jo shumë vonë kishte reaguar edhe vetë futbollisti përmes një postimi në Facebook, duke thënë se është e pavërtetë se ka pasur një kërkesë të tillë.
Këto fjalë i përsëriti edhe të dielën në emisionin ‘Dueli Sportiv’ në RTV Dukagjini.
”Unë e kam cekur edhe më herët dhe jam sqaruar në opinion për çështjen Kosovë-Shqipëri. Sa i përket demantimit dhe këtyre opinioneve që unë kam kërkuar të jem pjesë e formacionit titullar te Kosova, ajo nuk është e vërtetë. Unë kam pasur bisedime me trajnerin dhe pas bisedimeve jemi ndarë shumë mirë. Unë kam pasur të udhëtoj ditën e nesërme, por gjithçka na ndodhur aty. Pas atij takimi jemi ndarë me buzëqeshje. Këto gjëra mendoj që kanë ndodhur dhe do të vazhdojnë të ndodhin. Ne jemi profesionist dhe duhet të qëndrojmë profesionist,” tha Muja
Anësori i skuadrës belge, Antwerp, tani është pjesë e Kombëtares së Shqipërisë, me të cilën ka zhvilluar dy paraqitje.