Hetuesit policorë në bashkëpunim me Prokurorinë e Shtetit të martën kanë ndërmarrë veprime për zbardhjen e një rasti të dyshuar për vepra penale që ka zgjatur disa muaj, me ç’rast janë arrestuar dhjetë të dyshuar.
Hetuesit e policisë kanë grumbulluar të dhëna dhe dëshmi që kanë treguar se disa persona janë përfshirë në veprimtari penale të lidhura me lëshimin e çekëve të rremë dhe keqpërdorimin e kartelave bankare ose të kreditit.
Në këtë kontekst, është lëshuar një urdhër gjyqësor për të kryer kontrolle në 14 lokacione të ndryshme në qytetet: Prishtinë, Gjilan, Ferizaj, Kaçanik, Drenas, Suharekë dhe Deçan.
Prokuroria Themelore në Prishtinë ka njoftuar se nga ky rast aktualisht janë të dëmtuar katër institucione financiare dhe vlera e dëmit të shkaktuar deri më tani tejkalon shumën prej 400 mijë eurosh.
Dhjetë të dyshuarit e arrestuar, duke bashkëpunuar me njëri-tjetrin, akuzohen për përdorimin e kartelave bankare pa autorizim për të kryer transaksione të ndryshme, tërheqje të parave nga bankomatët dhe blerje të produkteve të ndryshme, duke kompromentuar kështu kartelat bankare në forma të ndryshme.
Në operacionin policor, janë sekuestruar prova të ndryshme që janë të rëndësishme për rastin, përfshirë kompjuterë, telefona celularë, USB, kartela bankare, dokumente, si dhe tre armë dhe municion.
Rasti aktual është duke u trajtuar në bashkëpunim të ngushtë me Prokurorinë e Shtetit.