Katër persona janë arrestuar të dielën e 16 korrikut në fshatin Dumnicë të komunës së Podujevës, dhe është sekuestruar një armë.
Sipas policisë, operacioni rezultoi pas marrjes së informatës për të shtëna me armë zjarri në atë zonë.
“Sot rreth orës 08:00, Policia e rajonit të Prishtinës respektivisht stacioni policor i Podujevës, ka kryer një operacion bastisjeje në fshatin Dumnicë të komunës së Podujevës, me ç’rast kanë arritur të gjejnë dhe të sekuestrojë një armë autokatike”, thuhet në njoftim.
Policia sqaron se ndaj të dyshuarit RR. Z, 56 vjeç, shtetas i Republikës së Kosovës, me rekomandimin e prokurorit të shtetit, është iniciuar një hetim në drejtim të veprave penale “Përdorim i armës apo mjetit të rrezikshëm”, “Mbajtje në pronësi kontroll ose posedim të pa autorizuar të armës”, si dhe “Shkaktim i rrezikut të përgjithshëm”.
Ndërkaq ndaj të dyshuarve; B. Z, 20 vjeç, M. H 23 vjeç, dhe Rr. H, 57 vjeç, të gjithë shtetas të Republikës së Kosovës, me rekomandimin e prokurorit të shtetit, është iniciuar një hetim në drejtim të veprës penale “Vetëgjyqësia”.
“Të dyshuarit, pas arrestimit, me aktvendim mbi ndalimin e personit të dyshuar, të nxjerrë nga ana e prokurorit të shtetit u dërguan në qendrën e mbajtjes prej 48 orësh, si vijimësi e fazave të mëtejme të procesit hetimor”, vijon njoftimi i policisë.