Policia e Kosovës tashmë ka arrestuar personin e katërt lidhur me garën e veturave, që përfundoi me fatalitet në Gjilan, ku si pasojë humbi jetën një 28-vjeçar.
Të arrestuarit dyshohet se nuk e kanë ndihmuar viktimën, por janë larguar nga vendi i ngjarjes.
“Rr. Nacionale Gjilan-PKK, Dheu i Bardh 25.01.2024 – 00:50. Në lidhje me rastin, me 28.01.2024 është arrestuar edhe i dyshuari tjetër (i katërti) mashkull kosovar dhe i njëjti pas intervistimit me vendim të prokurorit, është dërguar në mbajtje”, thuhet në njoftimin e policisë.
Policia të enjten pati njoftuar për vdekjen e 28-vjeçarit “në një vetaksident”. Po ashtu, edhe një person tjetër kishte mbetur i lënduar.
Për mosdhënie të ndihmës në raste të tilla dhe nëse ka viktima, Kodi Penal parasheh dënim me burgim deri në 8 vjet.
Prokuroria të premten ka ndaluar tre të dyshuarit për rastin. Sipas tyre, F.A. dhe B.A. janë ndaluar pasi dyshohen për veprat penale “Rrezik i trafikut publik me veprime apo mjete të rrezikshme’’ dhe ‘’Mosdhënia e ndihmës personit të lënduar në fatkeqësinë e trafikut publik’’, dhe L.M., për shkak të veprës penale “Mosdhënia e ndihmës personit të lënduar në fatkeqësinë e trafikut publik”.
Lexo edhe këtë: Policia jep detaje për vetaksidentin e djeshëm në Gjilan
Vdes një 28-vjeçar në një vetaksident në aksin rrugor Gjilan – Dheu i Bardhë
Prokuroria pritet që të kërkojë masën e paraburgimit ndaj të dyshuarve.