Policia e Kosovës ka njoftuar se është arrestuar të mërkurën një boshnjak me inicialet E.B., pasi dyshohet se ka qenë i përfshirë në veprën penale “Krime lufte kundër popullsisë civile”.
Sipas Policisë, pas intervistimit të dëshmitarëve, personi i dyshuar është arrestuar dhe është shoqëruar në polici.
“Policia e Kosovës, respektivisht Njësia për Hetimin e Krimeve të Luftës, me autorizim nga Prokuroria Speciale, ka zhvilluar hetime intensive lidhur me krimet e kryera nga forcat e armatosura të Serbisë gjatë periudhës kohore të viteve 1998/99 në Kosovë. Në vazhdën e hetimeve të zhvilluara dhe intervistimit të dëshmitarëve deri më tani, Policia e Kosovës me datën 19.10.2022 ka arrestuar të dyshuarin E. B. Mashkull/Boshnjak i cili është shoqëruar në Polici”, thuhet në njoftimin e Policisë.
Tutje, tregohet se i dyshuari i lartcekur është arrestuar nën dyshimin se ka marrë pjesë në veprën penale “Krime lufte kundër popullësisë civile”, në periudhën e viteve 1998/99 në një fshat në Komunën e Istogut.
Ndërkaq pas intervistimit, të dyshuarit me vendim të prokurorit dhe prezencë të avokatit, i është lëshuar aktvendimi për arrestim të përkohshëm dhe ndalim policor në kohëzgjatje prej 48 orësh.