Shërbimi Korremtues i Kosoves ka njoftuar se është arrestuar dhe është kthyer prapë në qendrën e paraburgimit i paraburgosuri G.K, i cili ishte arratisur nga automjeti që po transportohej për në Gjykatën Themelore të Gjakovës, më 29 dhjetor.
Tutje njoftohet se lidhur me rastin janë duke u zhvilluar procedura hetimore, si nga Prokuroria e Shtetit, ashtu edhe nga Shërbimi Korrektues i Kosovës.
ShKK-ja ka njoftuar të enjtën e 29 dhjetorit se një person i akuzuar për veprën penale “lëndim i lehtë trupor” është arratisur nga automjeti që po transportohej për në Gjykatën Themelore të Gjakovës.
“Shërbimi Korrektues i Kosovës njofton opinionin publik se sot gjatë përcjelljes për në Gjykatën Themelore në Gjakove/ Dega Malishevë, i burgosuri G.K i akuzuar për vepër penale lëndim i lehtë trupor, është arratisur nga automjeti me të cilin po transportohej”, thuhet në njoftim.
Në njoftim thuhet se ShKK e ka njoftuar menjëherë Policinë e Kosovës për t’i hetuar rrethanat e arratisjes.