Pas lirimit nga Serbia, tre zyrtarët policorë të Kosovës që ishin kidnapuar nga Serbia tashmë kanë arritur në Kosovë përmes vendkalimit kufitar në Merdare.
Pasi kaluan kontrollin serb, ata hynë në makina të Policisë së Kosovës dhe u nisën drejt Prishtinës, pa u deklaruar për mediat që ishin të pranishme.
Të tre policët ishin kidnapuar nga forcat serbe më 14 qershor brenda territorit të Kosovës.
Më herët, Ministria e Punëve të Jashtme dhe Diasporës konfirmoi se tre oficerët policorë të rrëmbyer në Republikën e Kosovës më datë 14 qershor, janë liruar pas seancës të mbajtur në Gjykatën e Lartë të Kralevës.
Sipas avokatëve mbrojtës, në këtë seancë, Gjykata e Lartë e Kralevës ka konfirmuar Aktakuzën e Prokurorisë së Lartë të Kralevës ndaj tre oficerëve policorë, ku ngarkohen për kryerjen e veprës penale “prodhim, mbajtje dhe qarkullim ilegal i armatimit dhe mjeteve shpërthyese,” sipas nenit 348, paragrafi 4, të lidhur me paragrafin 2 dhe 1 të Kodi Penal të Serbisë.
Prokurori nuk ka kërkuar që oficerëve policorë t’u vazhdohet paraburgimi, që Gjykata e ka pranuar, ku si rrjedhojë, u është lejuar të mbrohen në liri, respektivisht të kthehen në Republikën e Kosovës.