Avokati Anton Nrecaj ka folur lidhur me shfuqizimin e një grumbulli ligjesh nga Gjykata Kushtetuese.
Nrecaj është shprehur në FIVE në RTV Dukagjini se qëllimet politike të pamatura, duke mos respektuar ligjin dhe Rregulloren e Kuvendit, kanë edhe efekt juridik.
“Aktgjykimi i Gjykatës Kushtetuese është thirrur pikërisht në këtë pjesë, ku nuk ka lejuar që politika të cenojë rendin kushtetues”, ka thënë ai.
Tutje, avokati është shprehur se aktgjykimi ka qenë i fokusuar më shumë në pjesën e evitimit të vendimeve politike, të cilat potencialisht mund të cenonin rendin kushtetues.
“Andaj, edhe arsyetimi të cilin e jep dhe mosfutja në detaje e ligjeve si pako, me bë interpretimin Gjykata Kushtetuese, përfshi edhe Ligjin për konfiskimin e pasurisë së pajustifikueshme…”, ka thënë ai.
“Deputetët, kur e kanë adresuar çështjen në Gjykatën Kushtetuese, e kanë atakuar një vendim të qeverisë dhe ligjet e kaluara në Kuvend duke i shkelur parimet dhe dispozitat kushtetuese, prandaj nuk është futur, do të thotë, mbi bazën e meritës së ligjit, mirëpo e ka mbrojtur atë pjesë të mënyrës se si dhe ka qartësuar se cilat janë kompetencat e qeverisë…”, ka thënë ai ndër të tjera.