Në një prononcim për Dukagjinin ka folur edhe avokati i Faton Klinakut, Ramë Dreshaj, duke thënë se Klinaku është intervistuar në ambientet policore me urdhër të prokurorit special.
“Ai është intervistuar nën dyshimin nga neni 121 i Kodit Penal të Republikës së Kosovë që ka të bëjë vepra penale ‘Dhuna ndaj përfaqësuesve të lartë të Republikës së Kosovë’. Këtu thuhet dhuna, por në tekst përmendet kanosja. Ky nuk e ka mohuar postimin, mirëpo e ka arsyetu në mënyrë të detajuar dhe të sinqertë, logjike rreth atij postimi. Ky e ka thënë disa herë, e ka përsërit, nuk e kam kërcënuar, nuk e kam kanosur Albin Kurtin, po ky ka tregu, paraprakisht paska pasur bisedë me një të Vetëvendosjes, ai i thotë e kam votuar për ndryshime e jam zhgënjyer, dua të iki prej Kosovës. Aty ka lindur kjo për me ardhë deri te një postim i tillë që nuk lëshohet Kosova për gjithçka”, ka thënë Dreshaj.
Ndryshe, ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL UÇK), Faton Klinaku, është intervistuar nga Prokuroria Speciale lidhur me deklaratën e tij për kryeministrin Albin Kurti, e cila u vlerësua si kërcënim ndaj tij.
Më herët, lajmin për Dukagjinin e kishte konfirmuar vetë Klinaku, duke bërë të ditur se ai është intervistuar në prani të avokatit të tij, duke mos dashur të japë më shumë detaje.