Avokati Meshar Selimaj ka thënë se Aurona Pelaj, e cila dyshohet për sulmin fizik ndaj një të moshuare në shtëpinë e të moshuarve në Pejë, mund të ketë ikur në Gjermani.
Në një intervistë për EA, të premten e 27 janarit, Selimaj që është avokat i të moshuarës, ka theksuar se Prokuroria nuk ka ngritur ende aktakuzë ndaj saj.
“Me informacionet që kam, Aurona Pelaj mund të gjendet në Gjermani. Kështu po përflitet këto ditët e fundit. Prokuroria ende nuk i ka kryet hetimet. Prokuroria ende nuk e ka ngritur aktin-akuzues në gjykatë dhe gjykata ende nuk e ka mundësinë që ta ftojë Pelajn. Duhet të paraqitet me thirrjet, dhe nëse nuk paraqitet, merren masat për lëshimin e urdhër arrestit”, ka thënë ai.
Ndryshe, Gjykata Supreme e Kosovës ka vendosur t’ua ndërpresë paraburgimin tri infermiereve që u arrestuan në lidhje me sulmin fizik ndaj një të moshuareve në nëntor të vitit të kaluar.