Kryetari i Sindikatës së Punëtorëve të Sektorit Privat, Jusuf Azemi, ka paralajmëruar se rreth 60% e punëtorëve teknikë dhe sigurimi fizik i Universitetit të Prishtinës “Hasan Prishtina” do të lënë punën, për shkak të pagës së ulët.
Këtë e ka bërë të ditur, kryesindikalisti Jusuf Azemi, përmes një postimi në rrjetin social Facebook.
Sipas një kërkese publike, thuhet se punëtorët teknikë dhe sigurimi fizik që shërbejnë në UP janë të pakënaqur me deklarimet e sekretarit të UP-së që nuk kanë mjete për rritje page.
“Punëtorët teknik dhe ata të sigurimit fizik që shërbejnë në Universitetin e Prishtinës “Hasan Prishtina” janë shumë keq me pagat e tyre, deri më tani rreth 275 euro neto. Gjatë takimit me ta, por edhe në protestën e datës 22.12.2023 para Rektoratit të UP-së, këta kërkojnë pagë 405euro. Gjatë takimit me sekretarin e UP-së deklarohen se nuk kanë mundësi të rritjes së pagës më se 15% të kësaj shume, ata fajin e hedhin për mungesën e mjeteve”, thuhet në kërkesën e punëtorëve teknikë dhe të sigurimit fizik në UP.