Shefja e Grupit Parlamentar të LDK-së, Hykmete Bajrami, ka deklaruar se Lidhja Demokratike e Kosovës e mirëpret takimin e ftuar nga presidentja Vjosa Osmani për të dalë nga ngërçi politik në Kuvend.
Ajo ka theksuar se, ndonëse ftesa është bërë nga presidentja, nisma për një tryezë të përbashkët mes partive politike ka qenë fillimisht propozim i LDK-së.
“Është lajm i mirë që partitë politike po ulen së bashku, të ftuara nga presidentja, edhe pse iniciativa për të diskutuar për dalje nga kriza që e ka krijuar LVV-ja ka qenë propozim i yni”, ka deklaruar Bajrami.
Ajo ka bërë të ditur se kryetari i LDK-së, Lumir Abdixhiku, do të marrë pjesë në takim dhe do ta prezantojë në detaje idenë e tyre për zgjidhjen e situatës.
Sipas saj, në rast të një qeverie gjithëpërfshirëse, ndarja e përgjegjësive do të duhej të bëhej në bazë të rezultatit zgjedhor, jo përmes pazareve politike.
“Nuk kemi vendosur kushte, nuk kemi kërkuar dikastere, as nuk kemi diskutuar ndonjë ndarje të pozitave. Ndarja e përgjegjësive në një qeveri gjithëpërfshirëse mund të bëhet sipas përqindjes së votave”, ka theksuar ajo.